Ұлттық статистика бюросы 2021 жылғы санақ қорытындысы бойынша танымал есімдер мен тектерді жариялады, деп хабарлады Halyq Uni тілшісі.

Дерекке сәйкес, 10 реттен көп кездесетін 33 мыңнан астам есім және 100-ден астам рет кездесетін 29 мың тектің бары анықталды.

Қазақстанда ерлер арасында ең танымал есім төмендегідей:

• Азамат (63 мың адам);
• Серік (53 мың адам);
• Марат (50 мың адам).

Әйелдер арасында:

• Аружан (73 мың адам),
• Мәдина (59 мың адам),
• Динара (59 мың адам).

Ерлер мен әйелдер арасында бір мезгілде танымал болған есімдер – Бақыт пен Сәулет. Ерлерге де, әйелдерге де тән есімі бар адам саны – 585 мың.

Қазақ ер есімдеріне ең көп жалғанған сөздер «бай», «бек», «жан», «хан» болды. «Бек» өткен ғасырда өте танымал болғанмен, 2000-жылдардан кейін бәсеңдей бастады. Алайда құрамында «хан» сөзі бар есімдер соңғы 30 жыл бойы тұрақты түрде өсіп келеді.

Қазақтар қысқа есімдерді көбірек ұната бастаған. Бір қызығы, 70-80-жылдарды қоспағанда, ерлердің есімдері әйелдердікінен ұзағырақ болған.