Еліміздің шығысында қар жауып, батыста өрттің жоғары қаупі сақталады. Бұл туралы «Қазгидромет» РМК баспасөз хатшысы Алина Ысмағұлова айтты, деп хабарлады Halyq Uni тілшісі.

Оның айтуынша, Қазақстанның оңтүстік, оңтүстік-шығыс және шығыс бөлігіне оңтүстік циклон әсер етеді. Атмосфералық фронттардың өтуіне байланысты найзағай ойнап, жаңбыр жауады.

Шығыста түнде қар жауып, күндіз жауын-шашын болады. Оңтүстік-шығыстағы таулы аймақтарда жауын-шашын, оңтүстікте және оңтүстік-шығыста нөсер жаңбыр мен бұршақ жауады. Таулы аумақтарға да қара нөсер құяды. Елімізде жел күшейеді. Оңтүстікте, оңтүстік-шығыста қатты жел соғады. Батыста, солтүстікте жауын-шашынсыз ауа райы сақталады, - деді Алина Ысмағұлова ОКҚ-да өткен брифингте.

Сондай-ақ ол орталықта ауа температурасы төмендеп, батыста өрт қаупі болатынын атап өтті.

Ұлытау облысының шығысында түнде -2 градус аяз болады. Маңғыстау облысының басым бөлігінде және Қызылорда облысының орталығында, шығысында, батысында өрт қаупі жоғары болады, - деді баспасөз хатшысы.

Алина Ысмағұлова өткен тәулікте ауа райының қолайсыздығына байланысты гидрологиялық ескерту жарияланғанын жеткізді.

26-28 сәуір аралығында Жетісу облысының таулы аудандарында сел жүріп, өзендерде су деңгейінің көтерілу қаупі сақталады. Салдарынан өзендер арнасынан асып, жергілікті жолдар мен елді мекендерді су басуы мүмкін, - деді ол. 

Бұған дейін Атырауда тасқын қаупі бары хабарланған еді.