«ҚазАвтоЖол» және Korea Expressway Corporation ынтымақтастық туралы меморандумға қол қойды, деп хабарлады Halyq Uni тілшісі.

Бүгін Көлік министрлігінің «ҚазАвтоЖол» ұлттық компаниясы мен Оңтүстік Корея мемлекетінің өкілдерімен кездесу өтті. Korea Expressway Corporation – Оңтүстік Кореядағы ақылы автожолдарды салумен айналысатын және оларға қызмет көрсететін компаниялардың бірі.

Кездесу аясында шетелдік мамандарға «Астана-Теміртау» бағытындағы ақылы учаскесінің жұмысы таныстырылып, оларды күтіп-ұстау шаралары көрсетілді. Келіссөздер барысында қос тарап автожолдар мен көлік жүйелерін жүйелі жобалау, салу, техникалық қызмет көрсету және пайдалану саласы бойынша мәселелерді талқылады.

Іс-шараны қорытындылай келе, екі тарап өзара түсіністік пен ынтымақтастық туралы меморандумға қол қойды. Аталмыш құжат автожол саласында тәжірибе алмасуға әрі өзара тиімді ынтымақтастықты күшейтуге мүмкіндік береді.