Сыбайлас жемқорлыққа қарсы іс-қимыл агенттігінің Маңғыстау облысы бойынша департаменті Бірыңғай сатып алу терезесі арқылы мониторинг жүргізу барысында Мұнайлы ауданы білім бөлімінің бір дана кітапты 42 501 теңгеге сатып алмақ болғанын анықтады, деп хабарлады Halyq Uni тілшісі.

Антикордың мәліметінше, аталған мекеме 2024 жылға арналған мемлекеттік сатып алу жоспарларында бір көзден сатып алу тәсілімен 5 мың дана кітапты 212,5 млн теңгеге сатып алуды жоспарлаған.

Департамент тарапынан ұсыным жолданып, бір кітаптың бағасы 42 мың 501 теңгеден 5 мың теңгеге дейін, яғни 8 есе төмендетілді. Осылайша, 187,5 млн теңге бюджет қаражаты үнемделді.

Еске сала кетсек, тиімсіз сатып алулардың алдын алу арқылы 828 млн теңге көлемінде бюджет қаражаты үнемделген.

Сондай-ақ Антикор еріктілері бір көзден сатып алу заңдылықтарының бұзылуы бойынша бірнеше фактіні анықтады. Атап айтқанда, лауазымды тұлғалар төтенше жағдай салдарынан болған залалды орнына келтіру барысында тікелей келісімшарт жасаған. Салдарынан мемлекеттік сатып алу заңнамасының талаптары бұзылған.

Лауазымды тұлғаларға қатысты ҚР ӘҚБтК-нің 207-бабы 11-тармағымен 7 әкімшілік құқықбұзушылық туралы іс қозғалып, соттың шешімімен аталған тұлғалар 1 млн 600 мың теңге айыппұл төледі, – делінген хабарламада.