Кәсіпқой бокстан орта салмақтағы әлемнің экс-чемпионы Геннадий Головкин Ұлттық Олимпиада комитетінің президенті болып сайланды.

Қоғамдық бірлестіктің басшысын сайлау жабық есік жағдайында өтті. Оған БАҚ шақырылмады.

Бүгін Астанада Қазақстан Ұлттық Олимпиадалық комитеті Бас Ассамблеясының кезектен тыс отырысында ұйымның президенті мен басқа да басқару органдарының сайлауы болды. Ұйымды 2015 жылдан бері басқарған Тимур Құлыбаев өз өкілеттігін аяқтады. Қазақстан ҰОК-ның жаңа басшысы болып Геннадий Головкин сайланды. Бас Ассамблея мүшелері оның кандидатурасын бір ауыздан қолдады, – делінген ҰОК хабарламасында.

ҰОК жаңа президенті Бас Ассамблеяның кезектен тыс отырысында сөз сөйлеп, өз ойын айтты.

Жаңа лауазымда елге қызмет ету – мен үшін зор мәртебе. Маған Қазақстан Ұлттық Олимпиадалық комитетін басқаруды ұсынғанда, Қазақстан спортын дамытуға өз үлесімді қосуға мүмкіндік берсе ғана кандидатурамды ұсынатынымды айттым. Өздеріңіз білетіндей, мен саясаткер де, шенеунік те емеспін. Өз ісімді сөзбен емес, іспен дәлелдеп үйренгенмін. Осы орайда, менің өз көзқарасым, жылдар бойы жиналған халықаралық тәжірибем мен команданың бар екенін айтқым келеді. Ал ең бастысы және менің көптен бергі қалауым – барлығын да өзімнің туған елімде іске асыру, – деді ол.

Айта кетсек, былтыр Геннадий Головкин ресми түрде IBO тұжырымы бойынша орта салмақтағы әлем чемпионы атағынан бас тартқан еді. Бұл – оның осы кезге дейінгі соңғы атағы.

IBO президенті Эд Левин Головкиннің әлем чемпионы атағынан бас тартқаннан кейін орта салмақтағы атақ үшін басқа боксшылардың жекпе-жегіне рұқсат берілетінін айтты.

Бұған дейін Геннадий Головкин WBA Super және IBF чемпиондық белбеулерінен бас тартқан болатын. Енді оның әлем чемпионы деген атағы қалмады.

GGG соңғы рет шаршы алаңға 2022 жылдың күзінде шыққан еді. Сол кезде ол Сауль «Канело» Альвареске (59-2-2, 39 КО) қарсы жекпе-жек өткізіп, төрешілер бірауыздан жеңісті мексикалық боксшының еншісіне жазды.