Алматыда жүк тиеуші болып жұмыс істейтін Түркістан облысының тумасы күтпеген жағдайда қылмыстық қудалауға түсті. Бұған ер адамның ашуы себеп болған, деп хабарлады Терроризмге қарсы орталықтың баспасөз қызметі.

Орталықтың мәліметінше, 8 ақпанда Алматы полициясына Tele2 байланыс орталығының қызметкерінен хабарлама түскен: телефон арқылы белгісіз біреу жарылыс жасаймын деп қорқытып, қызметкерлерге қоқаң-лоқы жасаған.

Жедел іздестіру шаралары барысында Алматыдағы «Строй Сити» базарында жүк тиеуші болып жұмыс істейтін Түркістан облысының 1988 жылы туған тумасы ұсталды.

Жұмыс орнына келген ер адам телефонында интернет жоқ екенін байқаған. Содан кейін ол ұялы телефонынан Tele 2 байланыс орталығына қоңырау шалып, желі сапасының нашарлығына шағымданады. Оператор тарифті қайта қосып, 4000 теңге көлемінде төлем жасау керек деп жауап берді.

Абонент ашуға беріліп, әдепсіз сөздер айтып, қоқаң-лоқы жасайды. Кейінірек ол сол кезде не айтқаны есінде жоқ екенін мойындады. Қазіргі уақытта тергеу амалдары жүргізіліп жатыр, - делінген жазбада.