Алматыда апат салдарынан «Toyota Camry» көлігі дәмхананың жазғы алаңына кіріп кетті. Қалалық полиция департаментінің мәліметінше, жол апаты 24 мамыр күні кешкі сағат 19:47 кезінде болған.

«Төле би көшесі бойымен батыс бағытта, Әуезов көшесінің қиылысында келе жатқан «Toyota Camry» көлігінің жүргізушісі солға бұрылып жатып, Төле би көшесімен шығыс бағытта келе жатқан «Volkswagen Polo» көлігіне соғылған. «Volkswagen» жүргізушісі көлігін қалдырып, оқиға орнынан кетіп қалды.

Ал соқтығыс салдарынан «Toyota Camry» автокөлігі инерциямен Төле би көшесінің бойымен шығыс бағытта жүріп келіп, қоғамдық тамақтану орны орналасқан ғимаратқа кіріп кеткен, - деп хабарлады ПД баспасөз қызметі.

Соның салдарынан бір әйел зардап шегіп, ауруханаға жеткізілген. Бұл оқиға Алмалы аудандық полиция басқармасында тіркеліпті. Енді соның нәтижиесі бойынша процессуалдық шешім қабылданады.