Көлік полицейлері ұзындығы 222 метр рельсті ұрлаған бір топ адамды ұстады, деп хабарлайды Halyq Uni тілшісі Көліктегі ПД-ның баспасөз қызметіне сілтеме жасап.

2022 жылдың сәуір айында бір топ адам арнайы техниканы пайдалана отырып, «Жезқазған-РЗД-1» станциясының аралығында ауыстырып төсеуге арналған жалпы ұзындығы 222 метр болатын рельсті ұрлаған. Сонымен қатар 1600 метр темір жол төсемі зақымдалып, шығын сомасы 54 миллион теңгеден асты.

21 мамырда жедел-іздестіру іс-шараларын жүргізу барысында Қарағанды-Сұрыптау станциясындағы Желілік полиция бөлімінің қызметкерлері аталған қылмысты жасады деген күдікпен төрт адамды ұстады, – деп мәлімдеді Көліктегі полиция департаментінің бастығы Оңал Бекеев.

Департамент бастығы ұсталғандардан заттай дәлелдемелер алынғанын айтты. Қазір аталған факті бойынша ҚР ҚК 188-бабы 4-бөлігінің 3 тармағы, яғни аса ірі мөлшерде адамдар тобы алдын ала сөз байласу арқылы жасаған ұрлық бойынша сотқа дейінгі тергеу басталды.

Өзге мәліметтер тергеу мүддесіне қарай жариялауға жатпайды.