Майқайыңда автобуспен бірге шұңқырға құлап, табылмай жатқан адамдардың жақындары көріпкел шақыртты, – деп хабарлайды Massaget.kz.

Көріпкел Майқайыңға арнайы келген.

«Мен сиқыршы емеспін, әйтсе де адамдарға мен керек болдым. Шақырған соң қарап отыра алмай шығып кеттім. Жоғалғандар табылып, туыс-туғандары тыныштансын. Шынын айтсам,  бұл – өте қорқынышты»  – деп жазады көріпкел Майқайыңға бара жатып шығарған видеосында.

Бұдан кейін көріпкел Майқайыңда болған кезін баяндайды.

«Мен кенет кетіп барамын. Өзімнің көзқарасымды оларға айттым. Бұл – жерден сөмкені алып көтере салатын нәрсе емес қой. Менің ойымша, бүгін түнге дейін үлгерсе үлгереді, үлгермесе ертең ол жер туралы еститін боламыз. Себебі  оны көрсеткендей болдым. Екі адам да маған көрінді. Сол мен көрсеткен жерден табылады деп үміттенемін. Мен бара жатқанда-ақ маған аруақтар аян берді. Барған соң шұңқырдан қызғылт түсті көресің, сол жерде жатыр деді. Мен барғанда қызғылт түсті аумақты көрдім. Қазір сол жерді қазып жатыр», – дейді көріпкел.

Massaget.kz тілшісі жоғалған құтқарушы Айдос Шаймерденнің әйелі Нұрсұлуға хабарласты. Ол көріпкелді өздері шақырғанын растады.

Бұл дерекке қатысты Төтенше жағдайлар департаменті өкілдері жауап берді. Ведомство өкілдері, көріпкелді оқиға орнына шақыруға қатыстары жоғын, оны жоғалған қызметкерлердің туыстары шақырғанын айтты.

«Оған ешқандай ведомство қарсы бола алмайды. Ол бізбен бірге қауіпсіз жерде тұрды. Құтқарушылар жүргізіп жатқан іздеу-құтқару жерлеріне келмеді.

ТЖД қызметкерлері мен басқа да мамандар нұсқаулыққа сәйкес жұмыс істейді. Топырақтың, геосканердің және металл детекторының қозғалғыштығын сканерлеу үшін техниканы қолдану арқылы жұмыс жүргізіледі. Сондай-ақ  шахта түбінде кинологиялық есептеулер үнемі жұмыс істейді. Жұмыс бағыты мамандандырылған аспаптардың көрсеткіштері негізінде түзетіледі», – делінген ресми жауапта.