Кеше, 25 мамыр күні Тараздағы Тәуке хан көшесінде орналасқан «Қазақ хандығы» монументінің маңында Lexus көлігі каналға түсіп кеткен. Тізгінде 17 жастағы оқушы болған.

Облыстық Полиция департаментінің мәліметінше, сақтандыру полисіне сәйкес автокөлік құралын жүргізген 21 жастағы Lexus жүргізушісі таныс түлектермен бірге «Қазақ хандығы» монументіне келген.

Жүргізуші шаруасымен жүргенде оның 17 жастағы жолаушысы өз еркімен көлікті тізгіндеген. Осы кезде жас жігіт тежегіш пен газ педальдарын шатастырып алып, тізгінге ие бола алмай қалған. Сөйтіп, «темір тұлпар» каналға түсіп кеткен. Абырой болғанда, түлек зардап шеккен жоқ.

Осы құқықбұзушылық үшін кәмелетке толмаған оқушы ата-анасының қатысуында ӘҚБтК-нің 612-бабының 2-бөлігі («Көлік құралын басқаруға құқығы жоқ адамның басқаруы») бойынша әкімшілік жазаға тартылды. Түлектің ата-анасына 20 АЕК (63 600 теңге) көлемінде айыппұл салынды. Ата-аналармен профилактикалық әңгіме жүргізілді», - деп хабарлады ведомство өкілдері.