Биыл Астанада бірқатар инфрақұрылым нысаны салынып, пайдалануға берілді. Олар – «Оңтүстік-Шығыс» газ жылу станциясы, «Тұран» газ жылу станциясының бірінші кезеңі, ЖЭО-3-тің бірінші кезеңі және ауыз су станциясы (НФС-3), деп хабарлады Halyq Uni тілшісі.

Елорда әкімдігі баспасөз қызметінің мәліметінше, қала әкімі Жеңіс Қасымбек жылумен және сумен жабдықтау мәселелері қалай шешілетінін айтқан.

Өткен жылыту маусымында 432 Гкал жылу тапшы болды. Биыл үш жылумен жабдықтау нысанының құрылысы аяқталғандықтан, жағдай керісінше, профицитке шығып тұр. Мысалы, қазанда ЖЭО-3-тің бірінші кезеңінің құрылысы аяқталды, ол бұған дейін құрылысы ұзаққа созылған нысанға айналған болатын. Аталмыш жылу электр орталығында барлық төрт қазандық жұмыс істейді. Бұл қалаға сағатына 440 Гкал береді. ЖЭО-3 сол жағалаудың бір бөлігін және жаңа салынып жатқан аудандарды жылумен қамтиды. Сондай-ақ жаңа қуаттар жаңа энергия көздеріне іске қосылды. Бұл газ жылу станциялары (ГЖС) Қазақстанда алғаш рет ашылып отыр. «Оңтүстік-Шығыс» газ жылу станциялары мен «Тұран» бірінші кезеңінің қуаты сағатына 700 Гкал құрайды. Бұл – ЖЭО-3 қуатынан 2 есе артық, – деді Жеңіс Қасымбек.

«Оңтүстік-Шығыс» газ жылу станциясы «Бағыстан», «Мыңжылдық аллеясы» тұрғын үй кешендерін, Есілдің сол жағалауы бөлігін жылумен қамтамасыз етеді. Ал «Тұран» газ жылу станциясы сол жағалауда құрылысы жүріп жатқан жаңа аудандарды қамтиды.

Келер жылы ең алдымен «Телман» газ жылу станциясын және екінші кезекте «Тұран» газ жылу станциясын пайдалануға беру жоспарланып отыр. Бұл қаланы тағы 850 Гкал/сағ жылу қуатымен қамтамасыз етуге мүмкіндік береді. Осылайша, алдағы 5 жыл ішінде резервтік жылу қуатын қамтамасыз етеді.