Астанада ұлттық спорттың үздіктерін марапаттайтын «Алтын тұғыр» салтанатты іс-шарасы басталды. ҚР Ұлттық спорт қауымдастығының ұйымдастыруымен «Алтын тұғыр» жүлдесі биыл 10-шы рет табысталып, ұлттық спорт түрлері бойынша үздік спортшылар мен жаттықтырушылар марапатталады.

Салтанатты рәсім алдында іс-шараның негізгі қатысушылары – спортшылар, жаттықтырушылар, федерация президенттері мен өнер қайраткерлері көк түсті кілеммен жүріп өтті, оларды жанкүйерлер, фотографтар және марапат иелері қарсы алды.

Шараға 500-ге жуық адам жиналды. Қ.Қуанышбаев атындағы Қазақ музыкалық-драма театрында өткен марапаттау рәсімін ұйымдастырушы – Ұлттық спорт түрлері қауымдастығы нағыз мерекелік көңіл-күй сыйлады. Қонақтарға садақ ату, асық ату және тоғызқұмалақтан шеберлік сабақтары ұсынылып, қатысушылар өз күштері мен шеберліктерін сынға салды. Көпшілікке тәтті тағамдармен бірге, бауырсақтар да ұсынылды. Қонақтарды, әсіресе қымыздан жасалған субұрқақ таң қалдырды.

Біз өзімізді шынымен жұлдыздай сезіндік, мұндай ілтипат бізді айрықша қуантты. Бұл одан әрі жеңістерге жетуге, өз бетімізше жұмыс істеуге және өзімізді жетілдіруге күш береді. Бұл да өскелең ұрпақты ұлттық спортпен айналысуға, оның тарихын білуге баулиды, өз мәдениетін тануға ​​ынталандырады, - деп өз әсерімен Әділ Ахметов бөлісті.

Спортшыларды қолдауға қазақ шоу-бизнесінің жұлдыздары, танымал актерлер, блогерлер, Олимпиада чемпиондары келді. Салтанатты шараның құрметті қонақтары қатарында Ардақ Назаров, Сәнді Сұлтан, Ләйлә Сұлтанқызы, Аян Өтепберген, Мұхтархан Ділдәбеков, Асылхан Төлепов, KeshYou тобы, Нурбек Бекбау, Әділ Ахметов, Рзахан Әлихан және т.б. бар.

Біз дарынды спортшылармен жаттықтырушылармен бірге болғанымызды мақтан тұтамыз, олардың шеберлігі мен спортқа деген адалдығы бізді шабыттандырады, ал жетістіктері барша қазақстандықтар үшін үлгі. Біз олардың жаңа белестерге жету жолында қолдау көрсетуге қуана дайынбыз, - деп атап өтті Ләйлә Сұлтанқызы.

Ұлттық ойындарды кеңінен насихаттау мақсатында тағайындалған «Алтын тұғыр» жүлдесі беделді мәртебеге ие. Бұл - спортшылар мен бапкерлердің жетістіктері мен қосқан үлесін бағалайтын дәстүрлі спорт әлеміндегі ең ауқымды шаралардың бірі.

Айта кету керек, Ұлттық спорт түрлері қауымдастығына 10 федерация кіреді, оның ішінде «Тоғызқұмалақ», «Бәйге», «Құсбегі», «Көкпар», «Аударыспақ», «Жамбы ату», «Теңге ілу», «Дәстүрлі садақ» ату», «Асық ату» және «JORYQ» ат спорты федерациялары бар.

Шара «АМАНАТ» партиясы мен ҚР Туризм және спорт министрлігінің қолдауымен өтті. Іс-шараның бас серіктесі – «Самұрық-Қазына» АҚ, серіктесі «Sport Qory» туризм және спорт саласын қолдау қоры.