×

Президент «Болашақ» стипендиясының 30 жылдығына арналған салтанатты форум қатысушыларын құттықтады

Қазақстанды өркендете түсу үшін тың серпіліс қажет

 Динара Амантай 08.12.2023 | 11:34
Фото: t.me/aqorda_resmi

Президент Қасым-Жомарт Тоқаев «Болашақ» халықаралық стипендиясының 30 жылдығына арналған салтанатты форум қатысушыларына құттықтау хатын жолдады, деп хабарлады Halyq Uni тілшісі.

Құрметті Форумға қатысушылар! Баршаңызды «Болашақ» халықаралық стипендиясының белгіленгеніне 30 жыл толуымен құттықтаймын! Бұл – Қазақстанның әр түкпіріндегі дарынды жастарға жол ашқан теңдессіз бағдарламаның мерейлі белесі. Осы бірегей жоба мемлекетімізде озық ойлы әрі білікті кадрлар резервін қалыптастыруға зор септігін тигізді. «Болашақ» бағдарламасының мыңдаған түлегі бүгінде түрлі саладағы оң өзгерістің жаршысы болып, еліміздің игілігі үшін табысты еңбек етіп жүр, – деді президент.

Мемлекет басшысы қазір Қазақстанды өркендете түсу үшін тың серпіліс қажет екендігіне назар аударды.

Біздің алдымызда ел экономикасының құрылымын қайта түзу, саяси жүйені одан әрі жаңғырту және шын мәнінде әділетті әрі инклюзивті қоғам қалыптастыру сияқты ауқымды міндеттер тұр. Осы орайда білім беру саласына инвестиция салу және азаматтардың өз әлеуетін толық пайдалануына мүмкіндік жасау өте маңызды. Мемлекет адал азаматқа тән қасиеттерді бойына сіңірген дарынды, еңбекқор, талапты жастарды әрдайым қолдайды. «Болашақ» бағдарламасының түлектері ғана емес, еліміздегі барлық жас мамандар Қазақстанды жан-жақты жаңғырту жолындағы келелі іске өз үлесін қосады деп сенемін. Баршаңызға бақ-береке, толағай табыс тілеймін! – деді Қасым-Жомарт Тоқаев.

Серіктес жаңалықтары

Сараптама