2024 жылы оқулықтарды, оқу-әдістемелік кешендер мен оқу-әдістемелік құралдарды сараптау жұмыстарын арнайы электрондық платформада жүргізуге көшіру жоспарланған, деп хабарлады Halyq Uni тілшісі.

Оқу-ағарту министрлігі Республикалық ғылыми-практикалық білім мазмұнын сараптау орталығының мәліметінше, іске асырылып жатқан «Білім беру мазмұны мен білім беру ресурстарының сапасын бағалау жүйесі мен сараптаудың электрондық платформасын әзірлеу» кіші жобасының нәтижелерін жариялады.

Министрліктің қолдауымен ғылыми, ғылыми-техникалық жобаларды бағдарламалық-нысаналы қаржыландыру аясында «Білім беру мен ғылымды модернизациялаудың ғылыми негіздері» атты ірі бағдарлама қолға алынды. Ол арқылы білім беру мазмұнын сараптаудың электронды платформасы әзірленді. Бұл сараптама жүргізу кезінде оқу әдебиеттеріне сапалы таңдау жасауға ықпал етеді. Сондай-ақ оқулықтар мен ОӘК сарапшыларының мүмкіндіктерін кеңейтеді, – деді орталық директоры Назира Абдрахманова.

Платформа сараптама жүргізу кезінде обьективті шешімдер қабылдауға, сараптама процесін мониторингілеуді цифрлық сервисте іске асыруға көмектеседі.

Қазір электронды платформаның тестік нұсқасын таныстыру мақсатында Алматы, Астана қалаларында республикалық семинарлар ұйымдастырылып, онлайн режимде де презентациясы жасалды.

Бұл – жабық платформа. Оған тек сарапшылар, баспа өкілдері және орталықтың сыртқы сарапшылары ғана кіре алады.

Электронды платформа қолданысқа берілгеннен кейін сараптама процесі толық автоматтандырылады. Бұл сараптама процесін жеңілдетіп, сарапшы назарының тек оқулық мазмұнында болуына мүмкіндік береді.