Астанада рұқсат құжаттарынсыз салынған тұрғын үй кешенін бұзу жұмыстары басталды, деп хабарлады қала әкімдігінің баспасөз қызметі.

«Көктөбе» тұрғын үй кешені Алматы ауданындағы Ш. Қалдаяқов, К. Әзірбаев көшелерінің қиылысында орналасқан. Global Millennium компаниясы шұңқырын қазып, қадаларын қадаған. Іргетасын, бірінші қабатын да құйып қойыпты.

Құрылыс салушы шарт талаптарын орындамаған және нысанның құрылысын өз бетінше бастаған. Осыған байланысты Әкімшілік құқықбұзушылық туралы кодекстің 5 бірдей бабы бойынша хаттама рәсімделді. Бас мердігер – DBK-Engineering ЖШС да жауапқа тартылды.

Мамандандырылған ауданаралық экономикалық соты құрылыс салушыны тұрғын үй кешенін бұзуға міндеттеді.