Бүгін Астанадағы Alau мұз сарайында жекелей дистанцияда конькимен жүгіру спортынан Қазақстан Республикасының чемпионаты басталды, деп хабарлады Туризм және спорт министрлігінің баспасөз қызметі.

Чемпионат 2023-2024 жылдар аралығындағы жарыс маусымына спортшыларды іріктеу турнирі саналады. Жеңімпаздар мен жүлдегерлер ересектер арасындағы және халықаралық жарыстарға, Әлем кубогының кезеңдеріне, сондай-ақ Қысқы жасөспірімдер Олимпиадасына қатысуға мүмкіндік алады.

Чемпионаттың ашылу салтанатына Туризм және спорт министрі Ермек Маржықпаев қатысып, турнирге келген спортшыларды құттықтап, жарысты ұйымдастыруға атсалысқандарға алғыс білдірді.

Чемпионатқа еліміздің 7 облысынан 183 спортшы қатысады. Олар – Абай, Қостанай, Павлодар, Қарағанды, СҚО, ШҚО және Астана мен Алматының спортшылары.

Коньки жарысы қысқы спорттың басым түрлерінің бірі саналады. Сондықтан да біздің министрлік оқу-жаттығу жиындарын ұйымдастырумен, қазақстандық спортшылардың халықаралық жарыстарға қатысуын қамтамасыз етумен, сондай-ақ Қазақстанда халықаралық және республикалық жарыстарды ұйымдастырумен, өткізумен белсенді айналысып келеді. Спортшыларымызға жарқын жеңістер тілеймін, - деді Туризм және спорт министрі Ермек Маржықпаев.

Қысқы Олимпиадада барлығы 114 медаль жиынтығы сарапқа салынады. Конькимен жүгірушілердің ұлттық федерациясына кіретін спорт түрлері – шорт-трек, мәнерлеп сырғанау және конькимен сырғанау спорты бойынша 28 медаль жиынтығы қарастырылған.