Қазақстанда алимент төлемегені үшін 1 618 адам іздестіріліп жатыр, деп хабарлады Halyq Uni тілшісі.

Бас прокуратураның Құқықтық статистика және арнайы есепке алу жөніндегі комитетінің мәліметінше, іздеудегі адамдардың ішінде ерлер – 1 мың 476, әйелдер – 142. Іздестіруде жүргендердің көбі – 31-40 жас аралығындағылар.

Іздеуден жүргендердің көп бөлігі:

• Астана қаласы – 361;
• Алматы қаласы – 191;
• Ақтөбе облысы – 143;
• Қостанай облысы – 140;
• Жамбыл облысы – 140;
• Павлодар облысы – 108;
• Алматы облысы – 102;
• Маңғыстау облысы – 59 адам.

2023 жылдың 9 айында СДТБТ-да алимент төлеу жөніндегі міндеттерді қасақана орындамау фактілері бойынша 427 қылмыстық іс (Қылмыстық кодекстің 139-бабы) тіркелген.

Өңірлер бойынша мұндай қылмыстық құқықбұзушылықтардың ең көп бөлігі:

• Маңғыстау облысында – 46;
• Алматы облысында – 45;
• Қостанай облысында – 44;
• Шығыс Қазақстан облысында – 43;
• Павлодар облысында – 40;
• Қарағанды облысында – 35;
• Абай облысында – 32;
• Ақмола облысында – 26;
• Солтүстік Қазақстан облысында – 21;
• Астана қаласында – 17.

Осы кезеңде Қылмыстық кодекстің 139-бабы бойынша 207 адам сотталды. 4-еуі бас бостандығынан айырылса, 2-еуі шартты түрде сотталды, ал 196-сының бас бостандығы шектеліп, 5-еуі қоғамдық жұмыстарға тартылды.

Жалпы алимент бойынша сот орындаушылардың өндірісінде алимент өндіріп алу туралы 309 мың 670 атқарушылық іс орындауда болды. Бұл ретте балаларға ғана емес, ата-аналарын, жұбайын (зайыбын) күтіп-бағуға алимент өндіріп алынады.

• 291 мың 886 атқарушылық іс балаларды күтіп-бағуға арналған алимент бойынша;
• 773 атқарушылық іс еңбекке қабілетсіз ата-аналарын күтіп-бағу;
• 4 мың 506 атқарушылық іс  еңбекке қабілетсіз жұбайын (зайыбын) күтіп-бағу өндірістері болды.