Еріктілердің көмегімен мемлекеттік сатып алу саласында республика бойынша бірқатар бұзушылықтар анықталды, деп хабарлады Halyq Uni тілшісі.

Антикордың мәліметінше, 2 айда 1,5 мыңнан астам азамат жемқорлыққа қарсы еріктілер қатарына қосылған. Тамызда басталған «Сыбайлас жемқорлыққа қарсы волонтерлік» жобасына еліміздің барлық өңірлерінің белсенді азаматтары қатысуға ниет білдірді. Жетісу мен Ақтөбе облысында және Алматы қаласында жауапкершіліктері жоғары, мәселелерге бей-жай қарамайтын адамдардың ең көп саны тіркелді. Сонымен қатар, жемқорлыққа қарсы іс-қимыл мәселелеріне азаматтар мен қоғамдық бірлестіктер ғана емес, түрлі ұйымдар да тартылған. Еріктілер көбінесе мемлекеттік сатып алу саласындағы, оның ішінде бағаны көтеруге байланысты бұзушылықтарды анықтайды.

Елорда еріктілері мемлекеттік сатып алу порталының мониторингі барысында «Астана-Энергия» АҚ-ның тарапынан бағаны көтеру фактілерін анықтады. Бастапқыда бульдозерді 171 млн теңгеге сатып алуды жоспарлаған бағаны 147 млн теңгеге дейін төмендетті. Осылайша, бюджеттен 24 млн теңге үнемдеді.

Түркістан облысының жергілікті атқарушы органдары жобалау-сметалық құжаттаманы жасау бойынша көрсетілетін қызметтерді мемлекеттік сатып алу құнын көтерген болатын. Алайда, еріктілердің қырағылығының арқасында мемлекеттік органдар бағаны төмендетіп, нәтижесінде 27 млн теңгеден астам бюджет қаражатын үнемдеуге қол жеткізді.

Ақмола еріктілері мектепке дейінгі білім беру ұйымдарында балалардың қатысуын электрондық табелдеу жүйесін 20-ға жуық мемлекеттік сатып алуда бұзушылықтарды анықтады. Антикор мен ІМАД құжаттаманы зерттеп, бұзушылықтар фактілерін растады. Тапсырыс берушілердің білім бөлімдері атынан мемлекеттік сатып алу туралы заңнаманы бұза отырып, конкурстық құжаттаманы алдын ала талқылау кезінде әлеуетті өнім берушілердің ескертулерін ескермегені белгілі болды. Нәтижесінде сатып алулар жойылып, кінәлі адамдар тәртіптік және әкімшілік жауапкершілікке тартылды, ал конкурстар жойылған бұзушылықтарды ескере отырып, қайта жарияланатын болады.

Ұлытау облысында еріктілердің ұсынысымен мәслихат хатшысы үшін 40 млн теңгеге жуық сомаға премиум-класты қызметтік автокөлікті жоспарланған сатып алудан бас тартылды.

Ақтөбе облысында еріктілер тұрмыстық қалдықтарды шығару кезінде бұзушылықтарды анықтады. Ақтөбенің коммуналдық қызметтері бір айға жуық қоқыс шығармаған. Бұл қаланың қоршаған ортасына әсер етті. Еріктілер бұл жағдаймен айналыса бастағанда, ҚТҚ қызметтеріне тарифтің өсуіне байланысты сомалардың заңсыз есептелуіне байланысты 170 мыңнан астам тұтынушының 42 млн теңгені артық төлегені белгілі болды. Антикор еріктілерінің араласуынан кейін халыққа тиісті қайта есептеу жүргізіліп, қоқыс уақтылы шығарыла бастады.

Абай облысының еріктілері 166 ауылдық елді мекенді сумен жабдықтау саласына мониторинг жүргізген. 93 ауылда 2019-21 жылдары салынған су құбыры ішінара жұмыс істеп немесе мүлдем жұмыс істемейтіні анықталды. Анықталған кемшіліктер облыс әкімінің төрағалығымен Сыбайлас жемқорлыққа қарсы іс-қимыл жөніндегі ведомствоаралық комиссияда қаралды.

Бұзушылықтарды білім беру мекемелерінің еріктілері де анықтады. Оңтүстік Қазақстан университетінің жемқорлыққа қарсы волонтері емтихан кезінде студенттермен ұсынған жалған медициналық анықтамаларды анықтады. 185 анықтаманың 48-і «Damumed» мәліметтеріне сәйкес келмеген. Антикор тиісті медициналық мекемелерге хаттарын жолдап, нәтижесінде қалалық емхананың бірқатар кінәлі өкілдері тәртіптік жауапкершілікке тартылды.