Украина Қарулы күштері Ресей әскерімен соғыста ауыр қаруларды қолдануға кірісті.

Украина президенті офисі басшысының кеңесшісі Алексей Арестовичтің айтуынша, украин жауынгерлері қазірдің өзінде Батыстан алған ауыр қару-жарақтарды қолдануды бастап кеткен. Соның нәтижесінде украин сарбаздары Харьков қаласына таяу жерде тұрған жауды 40 шақырымға қуып шыққан. Қазір ауыр артиллерия Изюм бағытында қолданылып жатыр.

Әңгіме Британияның Brimstone ракетасы жайында болып отыр. Ол – кемеге қарсы атылатын зымыран, сонымен бірге жер бетіндегі нысандар үшін де қолдануға болады. Біздің әскеріміз оны белсенді түрде пайдаланып жатыр, – деді Арестович.

Сонымен бірге ол Украина қарулы күштерінің америкалық гаубицаларды да қолдануды бастағанын айтты.

Алайда, Қорғаныс министрлігі мен Бас штаб Батыс ауыр қару-жарақтарының майданға шығарылғаны туралы ресми мәлімдеме жасаған жоқ.