Шымкентте 3 жасар бала қолын электрлі еттартқышқа салып жіберген, деп хабарлады Halyq Uni тілшісі.

№3 қалалық ауруханасында ТЖД Жедел-құтқару жасағының қызметкерлері баланың қолын электрлі еттартқыштан босату үшін бірегей операция жүргізді.

Ауруханадан 112 құтқару қызметіне 3 жасар баланың қолын электрлі еттартқыштан босату керек деген ақпарат түскен.

Дәрігерлер оның қолын шығарып ала алмаған. Сондықтан құтқарушылардың көмегі керек болған.

Ата-анасының айтуынша, олар электрлі еттартқышпен жұмыс істеп жатқанда бала соның жанында болған. 

Құтқарушылар бірегей операцияны дәрігерлермен бірлесіп жүргізді. Төтенше жағдайлар қызметкерлері апаттық-құтқару құралымен еттартқышты мұқият кесіп, баланың қолын босатқан. Бұл сәтте балаға наркоз беріліп, ол ұйықтап жатқан.

Қазір 3 жасар бала №1 қалалық балалар клиникалық ауруханасындағы реанимация бөлімінде жатыр.

Құтқарушылар ата-аналарға сақ болуға, тіпті баланы 1 секундқа да назардан тыс қалдырмауға кеңес береді.