Цифрлық даму, инновациялар және аэроғарыш өнеркәсібі министрінің орынбасары Асхат Оразбек үш байланыс операторының қызметін пайдаланатынын, бірақ кейде оның да мобильді интернеті істемей қалатытын мойындады, деп хабарлады Halyq Uni тілшісі.

ОКҚ-де өткен баспасөз мәслихатында журналист вице-министрге «Асхат Елубайұлы, сіз қандай байланыс операторының қызметін пайдаланасыз? Мобильді интернеттің сапасына көңіліңіз тола ма? Компанияларға жиі хабарласып, шағымданасыз ба?» деп сұрақ қойды.

Вице-министр жұмыс бабы бойынша 3 мобильді оператордың қызметін пайдаланатынын атап өтті.

«Тарифиіне сай бәріне тиісті қаражатты төлеймін. Өкінішке қарай, мен де басқалар секілді осы проблемамен бетпе-бет келемін. Мен мобильді оператордың CEO-сына (бас атқарушы директорға) хабарласпаймын, call-орталыққа қоңырау шалуға тырысамын. Өз мәселемді айту үшін. Қиындықтар болып тұрады. Дөрекі сөйлеседі. Осыдан кейін ғана (мобильді оператордың – авт.) CEO-ға хабарласамын. Call-орталықтарында дөрекі жауап беретінін немесе қызмет көрсетуге қатысты мәселе барын айтамын», - деді Асхат Оразбек.