Жоғары қабаттан жаймаларды бір-біріне байлап, тағы бір баланы түсірдім, дейді ол
Өрт енді басталғанда ақкенттік жігіттер Ерік Төкенұлы мен Дәулетқали Нұрлан төрт досымен сол маңда сыртта тұрған. Олар өрт сөндірушілер келгенге дейін, одан кейін де құтқару жұмысына басынан аяғына дейін қатысыпты. Кілемді тауып әкеліп жүрген де солар екен, деп хабарлайды zakon.kz.
Есік алдында төрт досыммен тұрған едік. Ақырындап алдымен түтін шыға бастады. Ешкім жоқ ол кезде. Алдымен бірнеше баланы, хиджаптағы қызды алып шықтым. Одан кейін түтін қоюланып кетті. Жоғары қабаттан жаймаларды бір-біріне байлап, тағы бір баланы түсірдім. Төменде жігіттер оны қағып алды. 15-20 минутта 4 рет осылай көтеріліп шықтым. Одан кейін бізді ғимаратқа жолатпай қойды. Арнайы рұқсат жоқ, бетперде жоқ деп, дейді Дәулетқали Нұрланұлы.
Дәулетқали осы кезде бірінші қабаттағы пәтердің бірінің терезесінен кілем, матрасты көргенін айтады.
Терезені шақтық та оларды алып шықтық. Олармен кем дегенде 7-8 адамды тосып алдық, - дейді.
Ал Ерік Төкенұлы есінен танып қалған үлкен кісіге жасанды жолмен дем беріп, алғашқы медициналық көмек көрсеткенін айтады.
Бір кезде есін жинады, жедел жәрдем көлігіне салып жібердік. Бір әйел 6-қабаттан екі баласын лақтырды. Матраспен тосып алдық. Одан кейін өзі және әпкесі секірді. Сол кезде өзі есінен танып қалды. Оған да дем беріп, есін жидырды, дейді Ерік Төкенұлы.
Оның айтуынша, зардап шеккендер арасында қолы, жамбасы сынғандар бар көрінеді.
От күшейгенде ерікті жандар 16-қабатқа кранмен көтерілген екен.
Ол осы маңдағы құрылыс компаниясына тиесілі екен. Соларға және осы арадағы «Әсия» дүкенінің қожайынына алғыс айтамыз. Дүкен иесі су, сүт, айранның барлығын тегін таратты, дейді Дәулетқали Нұрланұлы.