Қазақстанда ұлттық бірыңғай тестілеуге шпаргалкамен кіретін түлектер азайып келеді. Бұл туралы ҒЖБМ Ұлттық тестілеу орталығының директоры Руслан Емелбаев айтты, деп хабарлады Halyq Uni тілшісі.

Иә, ҰБТ-ға шпаргалкамен кіретіндер азайып жатыр... ҰБТ-ны өткізу барысында 402 талапкер смартфон, шпаргалка және тағы басқа тыйым салынған заттарды алып өткені үшін тест тапсыру мүмкіндігінен айырылды. Тестілеу кезінде ережені бұзған 312 адам шығарылып, олардың ҰБТ нәтижесі жойылды, - деді орталық директоры ОКҚ-да өткен баспасөз мәслихатында.

Оның айтуынша, былтыр ҰБТ-ға тыйым салынған заттарды алып кіргені үшін 357 талапкер, ал тест тапсыру кезінде ереже бұзған 327 талапкер ҰБТ-ны тапсыру құқығынан айырылған.

Сондай-ақ Руслан Емелбаев биыл 31 қазанға дейін ұлттық бірыңғай тестілеудегі барлық видео тексерілетінін атап өтті.

Биыл 31 қазанға дейін (ҰБТ-дағы) барлық видео мен локты (цифрлық ізді) тексереміз. Егер тағы ереже бұзу анықталса, біз ҰБТ нәтижесін жоямыз. Былтыр постмониторинг нәтижесінде 212 талапкердің ҰБТ нәтижесі жойылды, - деді басшы.

Ол мұндай норма 2020 жылы алғаш рет қолданылғанын еске салды.

«Сол жылы (ҰБТ-дағы) видеоларды қайта қарау нәтижесінде 152 талапкердің, 2021 жылы 52 адамның, 2022 жылы 217 адамның ҰБТ нәтижесі жойылды. Биыл да бұл жұмыс жүргізіледі», - деп түйіндеді сөзін Руслан Емелбаев.