Бұл жәндіктердің әлемнің шығысынан батысқа қарай қоныс аударғаны байқалыпты
Павлодарлық ғалымдар елімізге тән емес, ерекше лепидоптера жәндіктері, яғни Catocala helena түнгі көбелектерін анықтады.
Қарағанды даласындағы көбелектің бұл түрін Торайғыров энтомологы Сергей Титов және оның Қазақстан биоалуантүрлілікті сақтау қауымдастығы мен БҒМ ҒК зоология институтындағы әріптестері ашты.
Бұрын Catocala helena Ресейдің Қиыр Шығысы, Корея, Қытай, Моңғолияда жалпақ жапырақты ормандарда өмір сүрген. Соңғы жылдары ол Забайкальеде, Батыс Сібірде байқала бастады. Қазақстанды айналып өтіп, Оңтүстік Оралға әрі Ресейдің еуропалық бөлігіндегі Еділ бойына жетті. Алайда қазір біздің зерттеулеріміз көбелектердің бұл түрі елімізде де пайда болғанын көрсетіп отыр. Біз бұл инвазивті түрдің болашақта Қазақстан табиғатына қандай әсер етуі мүмкін екенін анықтау үшін әрі қарай оның еліміздің аумағында да, шетелде де өмір сүру салтын бақылаймыз, - дейді Титов.
Сондай-ақ ғалымдар Catocala helena-ның неліктен шығыстан батысқа қарай қоныс аудара бастағанын және бұған дейін біздің фаунамызға белгісіз басқа инвазиялық жәндіктер осы көбелектерге ілесе ме, жоқ па, соны анықтауы керек.