Астананың емханалары жеке медициналық зертханаларға көрсеткен қызметтері үшін 5 млрд теңге қарыз. Бұл туралы Қазақстандық медициналық зертханалар қауымдастығы мәлімдеді, деп хабарлады Halyq uni.
 
Қауымдастық өкілі Абай Ахметбектің айтуынша, дебиторлық берешек 2022 жылдан бері жалғасып келеді.

«Бізде жыл сайын және тұрақты түрде қайталанатын бір үлкен проблема бар. Ол – медициналық-санитариялық алғашқы көмек тарапынан жеке зертханалар алдындағы дебиторлық берешегі. 2022 жылдан бері созылып келеді және 5 млрд теңгені құрап отыр.

Мәселе әртүрлі деңгейде бірнеше рет талқыланды. Біз қорға да, Денсаулық сақтау министрлігіне де жүгіндік. Мәселе қаржыландырудың жеткіліксіздігіне байланысты. Сондай-ақ қазір  сызықтық шкаланың енгізілуімен ол одан әрі күшейе түсті. Өйткені медициналық зертханалар – қызмет көрсетушілер емес, қызметтерді бірлесіп орындаушылар.

Тиісінше біз МСАК үшін қойылған шектеуді көрмейміз және бірлесіп орындау шарты бойынша емханалардан түсетін қызметтерді орындауға міндетті», – деді Абай Ахметбек.

«Әлеуметтік медициналық сақтандыру қоры» КеАҚ басқарма төрағасының орынбасары Айдар Нұралиев бұл жағдайда қызмет көрсетушілер мен қызметтерді бірлесіп орындаушылар арасындағы шарттық қатынастар туралы сөз болып отырғанын айтты.

Біз жеткізушілер мен бірлескен орындаушылар арасында отырмаймыз және түсінбейміз. Ол үшін бізде физикалық мүмкіндіктер де, ресурстар да жоқ. Міндетіміз – қор мен жеткізуші арасындағы қарым-қатынасты құру және барынша жетілдіру, – деді Айдар Нұралиев.

«Атамекен» ҰКП мәліметінше, емханалардың мұндай берешегі туралы шағымдар республиканың барлық өңірінен келіп түсіп жатыр.