Қазақстанда мемлекеттік бақылау жүргізілген балабақшалардың 80%-ға жуығы аттестаттациядан өтпеді. Бұл туралы ҚР БҒМ Білім және ғылым саласында сапаны қамтамасыз ету комитетінің төрайымы Гүлзат Көбенова хабарлады.

Биыл білім және ғылым министрлігі енгізген бақылаудың алғашқы жаңа түрі 77 балабақшада жүргізілді. Олардың басым көпшілігі, атап айтқанда 60 мектепке дейінгі білім беру ұйымы қызметіне қойылатын талаптарға сәйкес келмегендіктен аттестаттаудан өтпей қалды.

Балабақшалар әкімдіктердің қарауында болғандықтан, бұрын бізде мектепке дейінгі ұйымдардың жұмысын бақылаудың қандай да бір тетіктері болмаған. Бірақ азаматтардың өтініштерін ескере отырып, біз осындай тексерулерді енгізу және жүргізу қажеттілігі туралы шешім қабылдадық. Нәтижесінде біз көптеген бұзушылықтарды анықтадық. Бұл - балалардың балабақшада болмауы және білім беру қызметінің мемлекеттік жалпыға міндетті білім беру стандартының талаптарына сәйкес келмеуі, тәрбиешілердің қол жұмсау фактілері және тағы басқа бұзушылықтар. Бұзушылықтар анықталған жағдайда министрлік білім беру ұйымдарына оларды жою үшін жеткілікті уақыт беретінін түсіну маңызды. Мысалы, мемлекеттік аттестаттау қорытындысы бойынша балабақшаларға бұзушылықтарды жоюға және білім беру қызметін заңнама талаптарына сәйкес келтіруге (бір жылдан аспайтын) уақыт беріледі, - дейді комитет төрайымы Гүлзат Көбенова.

Мемлекеттік аттестаттау балабақшалардың меншік нысаны мен ведомстволық бағыныстылығына қарамастан, бес жылда бір рет жүргізіледі.

Заңға сәйкессіздіктер анықталған жағдайда білім беру ұйымдары ұсынымдар алады. Бірақ әкімшілік іс қозғалмайды, яғни әкімшілік жазалар болмайды. Керісінше, тексерушілер білім беру ұйымдарына бұзушылықтарды жою тәртібін түсіндіреді.