Президент Қасым-Жомарт Тоқаевтың қатысуымен өтетін іс-шаралар аңдатпасы жарияланды, деп хабарлады Ақорда.

Биыл 3-4 мамырда Астанаға Қасым-Жомарт Тоқаевтың шақыруымен Тәжікстан президенті Эмомали Рахмон мемлекеттік сапармен келеді, - деп жазылған хабарламада.

Қос ел басшылары шағын және кеңейтілген құрамда өтетін келіссөздер барысында Қазақстан мен Тәжікстан арасындағы стратегиялық серіктестікті одан әрі нығайту перспективаларын талқылайды.

Ал 3 мамырда мемлекет басшысы ФИФА президенті Джанни Инфантиноны қабылдайды.

Сондай-ақ 5 мамырда президент – жоғарғы бас қолбасшы Қасым-Жомарт Тоқаевтың қатысуымен Бүкілармиялық кеңес өтеді.

Жиын барысында әскери саланы дамытуға және әскер дайындығына, сондай-ақ Қазақстан армиясын технологиялық тұрғыда жаңғыртуға қатысты мәселелер қарастырылады.