Өзбекстанда Республикалық мамандандырылған травматология және ортопедиялық ғылыми-тәжірибелік медицина орталығында алғаш рет 1,5 жасар баланың омыртқасына күрделі ота жасалды. Бұл туралы Өзбекстан Денсаулық сақтау министрлігіне сілтеме жасаған uza.uz хабарлады.

Порталдың хабарлауынша, операцияны орталықтың мамандары Н.И. Пирогов атындағы Ресей ұлттық ғылыми-зерттеу медицина университетінің дәрігерлерімен бірлесе отырып жасады. Ота кезінде 1 жас 4 айлық баланың қосымша жарты дене омыртқасы алынып тасталды.

Операция 2021 жылы Ферғана облысының Өзбекстан ауданында туған Мухаммадусмон Ибрагимов деген балаға жасалған. Ол дүниеге келгенде омыртқа тұсында туа біткен аномалия деген диагноз қойылған. Яғни, кеуде-бел аймағында омыртқа жотасының қисаюы, сол жағында кеуде қуысының домбығуы байқалған. Уақытша емделгеннен кейін оның ата-анасы Республикалық травматология-ортопедиялық ғылыми-тәжірибелік медицина орталығына хабарласқан. Қажетті зертханалық-аспаптық тексерулерден кейін Мухаммадусмонға омыртқаның туа біткен даму аномалиясы, кеуде-бел омыртқасының туа біткен сколиозы, кеуде және бел омыртқасының кемістігі, сол жақ VThX жарты омыртқасы диагнозы қойылған , – делінген материалда.

Порталдың хабарынан белгілі болғандай, мекемеде VThX 12 жарты омыртқаларды алып тастау, сколиозды деформацияны түзету және эндокорректормен тұрақтандыру операциясы сәтті орындалды. Қазір науқастың жағдайы қанағаттанарлық. Орталық басшысы Мурад Ирисметовтың айтуынша, мұндай хирургиялық отаға дейін науқастың кәмелеттік жасқа толуы керек болған.

Нәтижесінде өткен кезеңде бүкіл омыртқаның ауыр сколиоздық деформациясы болып, соңында күрделі операция жасауға тура келген. Сонымен қатар, науқастың кеуде органдарында қайталама өзгерістер пайда болған. Бұл көбінесе науқастың өмір бойы мүгедек болып қалуына әкеледі. Енді бұл күрделі процедураның ерте жаста жүргізілуі жоғарыда аталған асқынулар мен туа біткен кемістіктердің алдын алу үшін қызмет етеді.