Семей қаласының құтқарушылары құлаған шатыр үйіндісінің астынан әйел мен баланы құтқарды, деп хабарлады Halyq Uni тілшісі.

Абай облысы ТЖД баспасөз қызметінің мәліметінше, бүгін сағат 09:34-те Семей қаласының «112» пультіне Сырлыбаев көшесінде жеке үйдің төбесі құлағаны туралы хабарлама түскен.

Оқиға орнына Абай облысының құтқару бөлімшелері дереу шықты. Сағат 09:42-де шақыру орнына келгеннен кейін, қонақ бөлмесінде тұрғын үйдің төбесі құлағаны анықталды. Құтқарушылар дереу барлауға кірісті. Барлау барысында олар үйінділердің астынан 41 жастағы әйелді және оның 1 жасар баласын құтқарды.

Құтқару бөлімшелері келгенге дейін үй иесі мен оның 11 жастағы қызы өз бетінше шыққан, ал 3 жасар баланы көршісі құтқарды.

Жедел медициналық жәрдем дәрігерлерінің қарауынан кейін зардап шеккендердің барлығы Семей қалалық ЖМЖА-ға жатқызылды.

Құлау алаңы 24 шаршы метрді құрады.

Құтқару операциясына Абай облысы ТЖД жеке құрамынан барлығы 11 адам мен 3 техника жұмылдырылды.