Батыс Қазақстан облысының қылмыстық істер жөніндегі мамандандырылған ауданаралық сотының шешімімен облыстың 29 жастағы тұрғыны аса ірі мөлшерде есірткі сатқаны үшін 11 жылға бас бостандығынан айырылды, деп хабарлады Halyq Uni тілшісі.

Полицейлер анықтағандай, 2022 жылдың жазында күдікті Telegram мессенджеріндегі арнаға тіркеліп, есірткі сатуды жоспарлаған. Бұл әрекетін жүзеге асыру үшін ол бір әлеуметтік желіні пайдаланушымен байланысып, Орал қаласында есірткіні заңсыз өткізу туралы келісім жасасқан. Қылмыстық ниетін орындау мақсатында өзінің «кураторынан» қосымша арқылы 100 мың теңге алып, пәтер жалдап, есірткіні буып-түюге және салмағын өлшеуге арналған электронды таразы, зип-пакеттер, түрлі-түсті изолента мен скотч сатып алған. Әрі қарай есірткіні жасыру орындарының координаттарын алып, тыйым салынған заттарды жасырып кеткен. Содан кейін ол жалға алған пәтеріне оралған.

Жедел іс-шаралар барысында облыстың есірткі қылмысына қарсы іс-қимыл жөніндегі қызметкерлері күдіктіні пәтерге жақын жерден ұстады. Ол өзімен бірге болған есірткі салынған пакетті лақтырып, жасырынбақ болған. Сараптама қорытындысына сәйкес, алынған заттар синтетикалық есірткі – «мефедрон» болып шықты. Салмағы шамамен 1 келіні құрады. Сот есірткі сатушыны кінәлі деп танып, 11 жылға бас бостандығынан айырды.

Айта кетейік, биыл 2 айда полицейлер елімізде интернет арқылы есірткі таратумен айналысқан 77 адамды ұстаған.