Астана қаласының әкімі Жеңіс Қасымбек қаладағы жолдардың сапасыз салынғанын айтты, деп хабарлады Halyq Uni тілшісі.

Көктемнің басталуымен кейбір көшелерде асфальт қармен бірге «ағып» кеткендей әсер қалдырады. Жолдардың бәрі дерлік сапалы салынбаған. Тұрғындар тарапынан да шағымдар түсіп жатыр. Жауапты басқарма жол қызметкерлерімен бірлесе жөндеуден өтетін жолдар мен көшелердің сапасын әрі ұзаққа шыдамдылығын қамтамасыз етуі керек, - деп жазды Жеңіс Қасымбек Facebook-тегі парақшасына.

Оның пікірінше, өтініштерді ескеріп, көшелер тізімін жаңарту керек.

Ең алдымен қозғалысы қарқынды, жаңа әлеуметтік нысандары (кірме жолдар) бар орындарды жөндеу қажет. Сол сияқты, елді мекендерде бұрын мүлдем асфальтталмаған көшелер де бар. Ал жаңадан салынып жатқан аудандарда инженерлік инфрақұрылым мен үйлердің құрылысы біткеннен кейін ғана жолдары салынады. Оған дейін уақытша төсеммен қамтамасыз ету қажет.

Жол жұмысының маусымы қысқа. Сол себепті, уақыт та тығыз. Біз сапасыз орындалған жұмыстарды қабылдамаймыз», - деді қала әкімі.