Бүгін таңертең Астанадағы қосалқы стансалардың бірінде өрт болып, салдарынан 23 тұрғын үй жарықсыз қалды.

Қала әкімдігінің хабарлауынша, сағат 8:20-да қуаты 110/10 кВ болатын «Заречная» қосалқы стансасында секцияны ажыратқыш ұяшықтар өртеніп, салдарынан №1 және №2 қуаттық трансформаторлар апаттық жағдайда тоқтатылған.

Сағат 8:40-та қосалқы стансаға өрт сөндіруші топ келіп, тілсіз жауды сөндіруге кірісті. Сағат 9:40-та өрт ауыздықталды. Технологиялық ақаудың себептері анықталып жатыр. Апаттан кейін қалпына келтіру бригадалары өртенген қондырғыларды ауыстырып, сынақтан өткізеді, - деп жазылған ресми мәліметте.

Соның салдарынан қаладағы А. Байтұрсынұлы, Б. Момышұлы, Керей-Жәнібек хандар, Ә. Бөкейхан, Түркістан, Мәңгілік ел көшелері мен Телман кентіндегі 23 тұрғын үй кешеніне электр энергиясын беру шектелген.

Енді ол үйлерге жарық өртенген қондырғылар толық тексеруден өтіп болғаннан кейін бір-ақ беріледі.