Iran Airtour әуекомпаниясының ұшағымен Маңғыстау облысына 137 турист келген
Ақтау әуежайы Иран астанасынан алғашқы чартерлік рейсті қабылдады, деп хабарлады Halyq Uni тілшісі.
Мәдениет және спорт министрлігі баспасөз қызметінің мәліметінше, Iran Airtour әуекомпаниясының ұшағымен Маңғыстау облысына 137 турист келген.
Осы демалыс күндері Ақтауға Иран елінің туристерімен екінші рейс келеді. Биыл басқа елдердерден де чартерлік рейстер күтіліп отыр.
Өткен жылы Қазақстан Иран, Қытай және Үндістан азаматтары үшін 14 күндік визасыз режим енгізген болатын.
Ақтау Ираннан келген қонақтар арасында үлкен сұранысқа ие. Сондықтан ирандық туроператорлар ұйымдастырған әуе рейстері мен турлар көп күттірмеді. Біз қазір келетін қонақтардың санын көбейту үшін жұмыс істеп жатырмыз. Сондықтан алдағы уақытта мұндай рейстердің де саны артуы керек. Болашақ серіктестермен келіссөздер үнемі жүргізіліп отырады, – деді МСМ Туризм индустриясы комитетінің төрағасы Дастан Рыспеков.