Биыл елімізде жалпы қуаттылығы 104,5 мың тонна болатын 26 жаңа көкөніс қоймасы ашылады, ал 2026 жылға дейін елде тағы 35 заманауи қойма пайда болады, деп хабарлады Нalyq uni тілшісі.

Ауыл шаруашылығы министрлігінің мәліметінше, қоймалар республикадағы сыйымдылығы 1,9 млн тонна 1208 сақтау объектілерінің тізіміне енгізіледі.

Соңғы жылдары Қазақстанда көкөніс қоймаларының тапшылығы өткір болды, әсіресе, мәселе маусымаралық кезеңде сезілетін. Сондықтан елімізде сақтау объектілерін салу және жаңғырту жөніндегі кешенді жоспар әзірленді. Ол кемінде көлемі 335,6 мың тонна болатын 97 жеміс-көкөніс өнімдерінің қоймасын салуды көздейді. Жұмыс жоспардағы көрсеткіштерден асып жүргізіліп жатыр. Мысалы, 2021-2022 жылдары 181,5 мың тоннаға 36 қойма салу жоспарланған болатын, іс жүзінде 200,8 мың тоннаға дейін өнім қабылдауға қабілетті 37 көкөніс қоймасы ашылды.

Көкөніс өнімділігінің көрсеткіштері өсіп жатқанын ескере отырып, еліміз үшін қолданыстағы көкөніс қоймаларын сақтау инфрақұрылымын кеңейту және жаңғырту мәселесі өзекті болып отыр. 2022 жылы отандық фермерлер 4,1 млн тонна картоп, 621,4 мың тонна сәбіз, 1,1 млн тонна пияз және 552 мың тоннаға жуық қырыққабат жинады. Оларды сақтау үшін инфрақұрылым салу ауыл тұрғындарының қолжетімсіз кірістерін толтыруға, импортқа тәуелділікті төмендетуге, сондай-ақ маусымаралық кезеңде түпкілікті тұтынушы үшін азық-түлік бағасын тұрақтандыруға көмектеседі.

Жоспарда қоймаларды салуға және жаңғыртуға инвестициялар тарту үшін өнімнің тауарлық қасиеттерін сақтай отырып, оның ұзақ мерзімді сақталуын қамтамасыз ететін арнайы жабдығы бар қазіргі заманғы қоймаларды салу кезінде инвестициялық субсидиялау нормативін 25%-дан 40-50%-ға дейін ұлғайту көзделеді.

Ауыл шаруашылығы министрлігі Павлодар облысындағы заманауи көкөніс қоймаларының біріне баспасөз турын ұйымдастырды. Нысан Григорьев ауылдық округінде 2019 жылы пайдаланылуға берілген. Кәсіпкер жобаға 820 млн теңге инвестиция салды, оның 200 млн теңгесін оған мемлекет өтеді. Қуаты 19 мың тонна көкөніс қоймасы кәсіпкердің өз өнімін де, жақын маңдағы аудандардың шаруа қожалықтарының өнімін де сақтауға мүмкіндік беріп отыр.

Ведомство өкілдерінің мәліметіне сәйкес, Павлодар облысында жалпы сыйымдылығы 460,6 мың тонна болатын 146 көкөніс қоймасы бар. 2022 жылы облыста 11 жаңа сақтау нысаны іске қосылды, биыл қуаттылығы 72,5 мың тонна болатын тағы 6 көкөніс қоймасы салынады.