Бас прокуратура сайлауға қатысты мәлімдеме жасады

Бас прокуратура сайлау алдындағы тыныштық күніне қатысты мәлімдеме жасады, деп хабарлады Halyq Uni тілшісі.

Бас прокурордың орынбасары Жандос Өмірәлиевтың айтуынша, бүгін түнгі сағат 00:00-де сайлауалды үгіт жұмыстары кезеңі аяқталады.

Ертең, 18 наурызда және дауыс беру күні – 19 наурызда кез келген үгіт жүргізуге тыйым салынады. 14 наурыздан бастап БАҚ-та сауалнама нәтижелерін, сайлау нәтижелерінің болжамдарын, сайлауға, кандидаттарды қолдауға дауыс беруге байланысты өзге зерттеулерді жариялауға да жол берілмейді. Сауалнаманы дауыс беруге арналған үй-жайда немесе бекетте жүргізуге болмайды, - деді ол ОСК отырысында.

Сауалнаманы тек Орталық сайлау комиссиясын жазбаша түрде хабардар еткен заңды тұлғалар сайлау учаскелерінен шыға берісте жүргізуге құқығы бар.

Оның нәтижесін БАҚ-да дауыс беру күнінен кейін яғни 20 наурыз түнгі сағат 00:00-ден бастап жариялауға рұқсат етіледі. Конституциялық заңның осы талаптарын орындамау Әкімшілік құқықбұзушылық туралы кодекстің 102 және 120-баптарында көзделген жауапкершілікке әкеп соғады. Заң талаптары Мәжілісі депутаттарымен қатар, барлық деңгейдегі мәслихат депутаттарының кезектен тыс сайлауына да қатысты, - деді Бас прокурордың орынбасары.

Айта кетейік, 19 наурызда Қазақстанда кезектен тыс Мәжіліс пен мәслихат депутаттарының сайлауы өтеді. Мәжіліс депутаттарын сайлауда 7 партиядан 283 кандидат бәсекеге түсті:

• Қазақстан Халық партиясынан – 52,
• Ақ жол партиясынан – 54,
• Жалпыұлттық социал-демократиялық партиясынан – 19,
• «Байтақ» жасылдар партиясынан» – 18,
• «Ауыл» партиясынан – 25,
• Respublica партиясынан – 25,
• AMANAT партиясынан – 90.