Газиантеп қаласындағы жойқын жер сілкінісінің салдарын жоюға жұмылдырылған қазақстандық құтқарушылардың бірінші эшелоны елге аман-есен оралды, деп хабарлады Halyq uni ҚР ТЖМ ақпаратына сілтеме жасап. 

Құтқарушылар мен Апаттар медицинасы орталығының дәрігерлері бар борт Алматы әуежайына қонды. Оларды туыстары, достары мен әріптестері күтіп алды.

Айта кетсек, мемлекет басшысының тапсырмасы бойынша 7 ақпанда құтқару бөлімшелерінің күштері мен құралдары алғашқылардың бірі болып екі эшелонмен жолға шығып, ең күрделі қираған объектілерде іздестіру-құтқару жұмыстарын жүргізуге кіріскен болатын. Қазақстандық құтқарушылар тобын ТЖМ бірінші вице-министрі Ибрагим Күлшімбаев басқарды.

Зілзаладан кейін Түркияның үш өңірінде іздестіру-құтқару жұмыстарын жүргізу басталғаннан бері қазақстандық құтқарушылар 7 адамды үйінді астынан аман алып шықты. Сондай ақ қаза тапқан 88 адамның (оның ішінде 10 бала бар) денесі шығарылды.

Құтқарушылар қолмен, сондай-ақ инженерлік техниканы, авариялық-құтқару жабдықтарын, шанц аспаптарын тарта отырып, 250 мың текше метрден аса үйінділерді бөлшектеді.

Қазақстан ТЖМ Апаттар медицинасы орталығының дәрігерлері де тәулік бойы зардап шеккендерге білікті медициналық көмек көрсетті. Барлық жұмыс кезеңінде 200-ге жуық жергілікті тұрғын мен құтқарушы, оның ішінде 30-ға жуық балаға медициналық көмек көрсетілді, – деп атап өтті министрлік.

Айта кетейік, қазақстандық іздеу-құтқару тобында кинологиялық есептоптар болды. Атап айтқанда, колли-нұсқаушылармен және құтқарушылар жасақтарымен қираған нысандарда бельгиялық малинуа Джейкоб, лига М Сириус және Аксель, Лабрадор Чарли Кинг, неміс овчаркасы Мирта, Гринпис аталатын бордер болды.

Жалпы, Түркиядағы іздестіру-құтқару жұмыстарына Астана және Алматы қалаларынан, Ақмола және Қарағанды облыстарынан құтқарушылар қатысты. Сонымен қатар, Қазақстан Үкіметі Түркияға 55 тонна гуманитарлық көмек жіберген болатын. Табиғи апат аймағына зардап шеккендерге көмек көрсетуге арналған шатырлар, жылыту құрылғылары, жылы киімдер және басқа да қажетті заттар жіберілді.