Алматыда IV қысқы Жастар спорт ойындары болып жатыр. Бүгін Алатау бөктеріндегі шаңғымен тұғырдан секіруден үздік жасөспірімдер анықталып, марапатталды. Бұл туралы Мәдениет және спорт министрлігінің Спортты дамыту дирекциясы хабарлады.

Соңғы жарыс күні аралас командалық сында Алматы қаласының бірінші командасы (2 қыз бен 2 ұл, – ред.) айтарлықтай басымдықпен жеңіске жетті. Одан кейінгі орынға Алматы-2 командасы мен Шығыс Қазақстан облысының спортшылары ие болды.

Жалпы есепте Алматы қаласы жеке-дара топ жарды. Шығыс Қазақстан облысы 2-орын алса, Алматы облысы үздік үштікті түйіндеді.

Барлығы «Сұңқар» халықаралық шаңғы трамплиндер кешенінде 4 өңірдің (Алматы қаласы, ШҚО, Жетісу және Алматы облысы, –  ред.) 100-ден аса спортшысы 5 жас санатына бөлініп, сынға түсті. Олар жекелей сында К-20 (12 жас), К-40 (13-15 жас), К-60 (14-16 жас), К-95 (17-20 жас) тұғырынан секірсе, командалық бәсеке К-90 трамплинінде болды.

Жарыс өзіме қатты ұнады. Қиын болды деп айта алмаймын. Десе де тартыс соңына дейін созылды. Шаңғымен тұғырдан секіруге 6 жасымда келгенмін. Биыл осы спортпен айналысқаныма 10 жыл болады. Кумирім – Данил Васильев. Жақын арада онымен бірге жаттығып, бірге өнер көрсетуді қалаймын,- деді 3 алтын медаль (жекелей және командалық) жеңіп алған алматылық Илья Мизерных.

Алматыда керлингшілердің жарысы да қызып жатыр. Оған 200-ге тарта жас спортшы қатысуда. Жарыста 2 қала мен 8 облыстан келген командалар екі топқа бөлінген. Жеңімпаз бен жүлдегерлер 12 ақпанда белгілі болады.

Жалпы, биылғы жарыста 11 спорт түрінен үздіктер анықталады. Барлық бәсекеден соң әр спорт түрінен еліміздің жастар құрамасы жасақталып, алдағы халықаралық ресми жарыстарға, оның ішінде 2024 жылы Оңтүстік Кореяның Канвондо қаласында өтетін қысқы Жасөспірімдер Олимпиадасына баратын спортшылар анықталады. Сондай-ақ 2026 жылғы Италияның Милан қаласында өтетін Олимпия ойындарына дайындалуға қатысатын спортшылар іріктеледі.

Ойындардың салтанатты ашылуы 23 ақпан күні Павлодар қаласында сағат 14:00-де, ал жабылу рәсімі  8 сәуірде сағат 14:00-де Астана қаласында болады.

Биылғы Жастар спорт ойындарының жеңімпаздары келесі жылы Оңтүстік Кореяның Канвондо қаласында өтетін қысқы Жасөспірімдер Олимпиадасына барады.