Түркістандық тергеушілер 25 жыл бұрын із-түзсіз кеткен шетелдік қызды жақындарымен қауыштырды, деп хабарлайды Polisia.kz.

Өткен жылдың наурыз айында Түркістан облысы Сарыағаш аудандық полиция бөліміне көршілес қаладағы полиция бөлімінен Өзбекстан Республикасының азаматы, яғни үй-күйсіз (аты-жөні белгісіз, құжатсыз) жүрген жасы 40-тан асқан әйелдің ісі келіп түскен.

Онда Шымкент қаласындағы дағдарыс орталығына түскен өзбекстандық әйел Сарыағаш ауданындағы притонда сексуалдық құлдықта болғанын, 10 жасында әке-шешесі Өзбекстан Республикасына белгісіз біреулерге сатып жібергенін айтқан.

Осы іс бойынша сарыағаштық полицейлер жан-жақты тергеу әрекеттерін жүргізді. Сол жылдың қарашасында іс Түркістан облысы ПД-ның өндірісіне қабылданды. Тергеу барысында сот-медициналық, сот-психиатриялық сараптамалары тағайындалды. Оның жақын таныстарынан жауап алынды.

Осыдан соң желтоқсан айында ҚР ІІМ арқылы Өзбекстан Республикасына жәбірленушінің жеке басын анықтау мен оған қатысты адам саудасы қылмысы болған-болмағанын  анықтау үшін халықаралық тапсырма жолданды.

Полиция департаменті жүргізген жүйелі жұмыс нәтижесінде департамент қызметкерлері Өзбекстан Республикасы Қашқадария облысы ШаҺрисабз ауданы Сарчашма ауылынан жәбірленушінің әке-шешесі, туған-туыстарын анықтап, олармен кездесу жұмыстарын жүргізді.

Түркістан облысы полиция департаментінің полицейлері әйелдің заңды түрде құжат алуы  үшін қажетті шаралардың барлығын атқарып, жеке куәлігі мен төлқұжатын алуға ықпал етті. Қазіргі таңда жәбірленушінің өз еліне оралуына жағдай жасалып жатыр. Анықталғандай, жәбірленуші 17 жасында үйінен кетіп қалған. Ал жәбірленушінің құлдықта болдым, әке-шешем сатып жіберген деген уәждері дәлелін таппай ҚР ҚПК-нің 35-бабының 1-бөлігінің 2-тармағымен тоқтатылды.