Ақтауда кетіп бара жатқан 39 жастағы ер адамның үстіне 6-қабаттан диван құлады, деп хабарлады Inaktau.kz.

Соққының салдарынан тұрғынның мойын омыртқасы сынып, жұлынына зақым келген.

Ер адам сал болып қалды, - деп жазылған облыстық аурухананың баспасөз қызметі таратқан хабарламада.

Дәрігерлер ер адамның ауыр халде жатқанын атап өтті. Ал Маңғыстау облысы полиция департаментінің мәліметінше, ер адамның үстіне 6-қабаттан диван құлаған.

Тәртіп сақшылары оқиғаның мән-жайын анықтап жатыр.

Бұл дерек Қылмыстық кодекстің 114-бабы бойынша («Денсаулыққа абайсызда зиян келтіру») полиция басқармасының сотқа дейінгі тергеп-тексеру бірыңғай реестріне тіркелді, - деп жазылған хабарламада.

Бүгінде жәбірленушінің туыстары куәгерлерді іздеп жатыр. Болған оқиғадан хабарыңыз болса, төмендегі нөмірге хабарласа аласыз:

• +7702 811 03 82.