Солтүстік антициклоны Қазақстан аумағы арқылы оңтүстік өңірлерге қарай жылжып жатыр. Осыған байланысты қатты аяз еліміздің көп бөлігінде сақталады, деп хабарлады Halyq Uni тілшісі Қазгидрометке сілтеме жасап.

Оңтүстік пен оңтүстік-шығыстың таулы аймақтарында қатты қар жауады.

Ауа температурасы батыста түнде -27-35, күндіз -15-25 градус аяз, республиканың оңтүстік-батысында түнде -12-23, күндіз -5-15 градус аяз, солтүстік-батыста және солтүстікте түнде -32-40 градусқа дейін, күндіз -27-35 градусқа дейін аяз болады.

Орталықта негізгі фон түнде -35-40, өңірдің оңтүстігінде -25-30 градус аяз, күндіз -20-30 градус аралығында аяз, шығыста ауа температурасы түнде -20-33 градус аяздан 30-43 градус аязға дейін, күндіз 15-23 градус аяздан 23-33 градус аязға дейін барады.

Оңтүстікте, оңтүстік-шығыста түнде -10-20 градус аяздан -20-31 градус аязға дейін, күндіз -8-16 градус аяздан -12-23 градусқа дейін төмендейді.