Ақтөбе облысында «Ауыл аманаты» жобасын жүзеге асыру үшін биыл 3,5 млрд теңге бөлінеді, деп хабарлады Halyq Uni тілшісі.

Облыс әкімдігі баспасөз қызметінің мәліметінше, «Ауыл аманаты» жобасы І кезеңінің іске асырылу барысы өңір басшысы Ералы Тоғжановтың төрағалығымен өткен жиында талқыланған. Жиынға облыс әкімінің орынбасарлары, мемлекеттік органдардың басшылары, облыстық мәслихат депутаттары, Қоғамдық кеңес мүшелері және аудан әкімдері қатысты.

Ауыл халқының табысын арттыру мақсатында іске асырылған жобаның I кезеңіне 12 аудандағы 24 ауылдық округтің тұрғындары қатысып жатыр. Олар құс және өсімдік шаруашылықтарын дамытуға, кооперативтерді жабдықтауға, шағын және орта кәсіпкерлікті дамытуға бағытталған 2 772 жобаны жүзеге асыратын болады. Өткен жылдың желтоқсан айында «Ауыл аманаты» жобасын қаржыландыруға 3 млрд теңге бөлінді.

Біз бірнәрсені дұрыс түсінуіміз керек. Басты мақсат – ауыл тұрғындарына қолдау көрсету, оларды жұмыспен қамту, табысын арттыру. Бұл – ең өзекті мәселелердің бірі. Оны шешсек, біз ауылдан халықтың көшуі мәселесін шеше аламыз. Мемлекет басшысының алға қойған міндетіне сәйкес, әрбір ауылдық округ, әрбір аудан әкімінің жоба аясындағы жұмыстары статистикалық есептер негізінде емес, нақты нәтижелерге сүйене отырып бағаланатын болады, - деді Ералы Тоғжанов.

Сонымен қатар, I кезең аясын кеңейту мақсатында жобаға қатысатын ауылдық округтердің санын арттыру туралы шешім қабылданды. Жеңілдетілген қарыздың шекті сомасы шамамен 8,6 млн теңге,(2,5 мың АЕК-ке дейін), ал кооперацияны дамытуға 27,6 млн теңгені (8 мың АЕК-ке дейін) құрауы мүмкін.

Ақтөбе облысындағы жобаның ерекшелігі мал шаруашылығын дамыту үшін ірі шаруа қожалықтары есебінен тауарлық несиелер беру болып отыр. Бүгінде 19 шаруашылық есебінен 38 жеке қосалқы шаруашылыққа 577 бас мал берілді. Шаруалар тауарлық несиеге берген малын ақшалай емес, төл есебінен қайтарады.

Жоба аясында несие алушы жеке қосалқы шаруашылықтар ауыл шаруашылығы өндірістік кооперативтеріне бірігу арқылы қызметін жүзеге асырмақ. Бүгінде 12 ауданнан құрамында 155 қатысушысы бар 27 кооператив тіркелді.

Облыс әкімінің тапсырмасымен ауыл тұрғындары құс және басқа да бағыттар бойынша шаруашылық негіздерін оқиды, қажетті кеңестері бар әдістемелік материалдармен қамтамасыз етіледі.

Бұған қоса, биыл «Ауыл аманатына» қосымша 3,5 млрд теңге бөлінетіні белгілі болды. Сондай-ақ жиын барысында ауылдық аумақтарды дамыту жөніндегі тұжырымдаманы әзірлеуге қатысты мәселе қаралды. Құжат аясында 315 елді мекенде әлеуметтік-экономикалық даму, ауыл шаруашылығын дамыту, инженерлік инфрақұрылым мәселелері кезең-кезеңімен шешілетін болады.

Әр ауылға облыстық басқарма басшылары, мәслихат депутаттары, Қоғамдық кеңес мүшелері, БАҚ өкілдері қатарынан жауапты адамдар бекітілген. Олар «Ауыл аманаты» жобасын халыққа түсіндіріп, бағдарламаның іске асырылуын бақылауға тиіс.