Таразда көпқабатты тұрғын үйдің балконы отқа оранды. Өрт түнгі отшашудан тұтанған, деп хабарлайды Экспресс К. 

Бұл жағдайдың бейнежазбасы әлеуметтік желіде тарады. Видеодан тұрғын үйдің екінші қабатындағы балконда оттың лаулап жанып жатқанын көруге болады. Ал тұрғындар шарасыз аулада тұр.

Аталған жағдайды Жамбыл облысы Төтенше жағдайлар департаментіндегілер растады. Олардың айтуынша, өрт 15-ықшамауданда болған.

«Түнгі сағат 3:03-те өрттің тұтанғаны жайлы ақпар түсті. Шұғыл оқиға орнына төтеншеліктер шықты. Арнайы саты көмегімен 5 адам эвакуацияланды. Оның екеуі бала», — делінген ТЖД ақпаратында.

Жалын 5 шаршы метрге жайылған. Өрт жарты сағат болмай сөндірілді. Зардап шеккендер мен жарақат алғандар тіркелмеген.