Павлодарда полицейлер ұрлық жасаған астаналықтарды ұстады, деп хабарлады Polisia.kz.

Астрахан ауданы полиция бөліміне 56 жастағы ауыл тұрғынынан шағым түскен. Ол 17 қарашаға қараған түні белгісіз адамдар дүкеннен 5 млн теңгеден асатын сомаға зергерлік бұйымдарды ұрлап кеткенін айтқан.

Олар дүкендегі есікті күшпен ашып, 250-ге жуық зергерлік бұйымды ұрлаған. Жедел іздестіру іс-шаралары барысында күдіктілердің кім екені анықталды. Криминалдық полиция қызметкерлері Павлодарда 27 жастағы екі астаналықты ұстады, – деп жазылған хабарламада. 

Бұл фактіге қатысты Қылмыстық кодекстің 188-бабы 3-бөлігі («Ұрлық») бойынша сотқа дейінгі тергеу жүргізіліп жатыр. Күдіктілерден зергерлік бұйымдар тәркіленді. Олар уақытша ұстау изоляторына қамалды.

Бүгінде полиция қызметкерлері басқа адамдардың бұл қылмысқа қатысы бар-жоғын анықтап жатыр.