Кеше Сыбайлас жемқорлыққа қарсы іс-қимыл агенттігі «Самұрық-Қазына» АҚ, «Самұрық Энерго» және «Қазақстан темір жолы» компанияларының кейбір басшыларына қатысты тергеу жүріп жатқаны туралы ақпарат жариялады.

«Самұрық-Қазына» ұлттық компаниясы Сыбайлас жемқорлыққа қарсы іс-қимыл агенттігімен көздеген ортақ мүдде үшін тығыз байланыста жұмыс істеп жатқанын хабарлады.

Өздеріңізге мәлім, Қазақстан президенті Қасым-Жомарт Тоқаевтың тапсырмасы бойынша Қорды реформалау бағдарламасы қабылданды. Оның басты тармақтарының бірі сыбайлас жемқорлықпен күрес және заңнаманы сақтау, - елінген ұлттық компанияның хабарламасында.

Қордың бүкіл компаниялар тобында сыбайлас жемқорлықпен күресу бойынша белсенді жұмысты тұрақты жалғасын табатыны хабарланды.

«Біз өз тарапымыздан «Самұрық-Қазына» қорындағы сыбайлас жемқорлықтың кез келген көріністерін жою үшін тергеуге жан-жақты көмек көрсетуді жалғастырамыз.

Нақты нәтижелері де бар, атап айтқанда сатып алудың ашық тетігі әзірленді, бизнес үшін әкімшілік кедергілер жойылды, сәйкестік пен сыбайлас жемқорлыққа қарсы іс-қимыл мәселелері бойынша озық тәжірибе бекітілді және оны жетілдіре береміз», - делінген Қор хабарламасында.

Еске салайық, кеше, 3 наурызда ҚР Сыбайлас жемқорлыққа қарсы іс-қимыл агенттігі «Самұрық-Қазына» АҚ, «Самұрық Энерго» және «Қазақстан темір жолы» компанияларының кейбір басшыларына қатысты тергеу жүріп жатқаны туралы ақпарат жариялады.