Ол ұрлаған заттарды ломбардқа өткізіп, одан түскен ақшаға несиесін жапқан
Шымкентте фотоаппарат ұрлаған ер адамға сот үкімі шықты, деп хабарлады Polisia.kz.
21 жастағы күдікті Шымкенттегі бизнес орталықтан құны 2 млн теңге болатын 2 SONY A7-3 фотоаппаратын ұрлаған. Қаратау аудандық сотында оның ісі қаралды. Судья оны кінәлі деп тауып, 3,5 жылға бас бостандығын шектеді. Залал сомасы – 2 млн теңге.
Тергеу барысында күдікті ұрланған фотоаппараттарды Алматы қаласындағы ломбардтардың біріне 1 млн 350 мың теңгеге өткізген. Одан түскен ақшаға несиесін жапқан.
Басты сот отырысында сотталушы өзіне тағылған айыпты толық мойындап, әрекетіне өкінетінін айтқан. Судья айыпталушының қылмыстық жауаптылығы мен жазасын жеңілдететін мән-жайды, жасаған қылмысының қоғамға қаупі мен дәрежесін, оның жеке басының деректерін ескеріп, Қылмыстық кодекстің 188-бабы 3-бөлігінің 1 және 3-тармағы («Ұрлық») бойынша 3,5 жылға бас бостандығын шектеді, - деп жазылған хабарламада.
Сондай-ақ сотталушы пробациялық бақылауда болып, жергілікті атқарушы органдар айқындайтын орындарда жыл сайын 100 сағатқа мәжбүрлі еңбекке тартылу міндеттелді.