Түркістанда қазақ күресінен ересектер арасында Қажымұқан Мұңайтпасұлы атындағы жүлдеге арналған Азия кубогы үшін халықаралық турнир басталды. Дәстүрлі жарыста Тәжікстан, Өзбекстан, Қырғызстан, Қытай мемлекеттері мен еліміздің барлық өңірлерінен келген 300-ге жуық спортшы күш сынасады.

Екі күн бойы жалғасатын балуандар белдесуінде 55, 60, 66, 74, 82, 90, 100, +100 келі салмақ дәрежесіндегі үздіктер анықталатын болады. Жарыстың бас төрешісі Ерлан Иманғалиевтің айтуынша, жеңімпаздарға қаржылай сый-сияпат ұсынылып, түйе балуанға автокөліктің кілті табыс етіледі.    

Жуырда Түркістан қаласында қазақ күресінен «Тұран барысы» Азия кубогы ұйымдастырылып, жарыстың нәтижесінде Қазақстан құрама командасы жеңімпаз атанған болатын. Жалпы Түркістан облысында 4 облыстық, 28 аудандық және қалалық балалар мен жасөспірімдер спорт мектебінде қазақ күресі бөлімдері бар. Онда 148 жаттықтырушы 3 600-ден аса баланы жаттықтырады.