Риддерде жылу электр орталығы істен шығып, Шығыс Қазақстан облысының әкімі Даниал Ахметов оқиға орнына барды деп хабарлады Halyq Uni тілшісі.

«Риддер-ЖЭО» АҚ-ында болған төтенше жағдай бойынша шұғыл түрде штаб құрылды. 5 қараша кешкі сағат 20.00-де күл шығару жүйесіндегі жылу станциясында сорғы істен шығып, №1 қазандық агрегатының қосалқы жабдығы апатты жағдайда ажыратылды. Салдарынан салқындатқыштың температурасы +39 °С-қа дейін төмендеді (қалыпты температура +70 °С). Бүгінде Риддер қаласының 22 мыңнан аса абонентке жылу беру азайтылды, - деп жазды Даниал Ахметов Instagram-дағы парақшасында.

Оның айтуынша, шұғыл түрде апатты жою жөніндегі штаб құрылған.

«Ол тәулік бойы жұмыс істейді. Сондай-ақ жылу станциясына Согра және Өскемен ЖЭО, «Өскемен жылу желілері» АҚ мамандары келді. Қазіргі уақытта күл шығару жүйесінде қозғалтқышты ауыстыру, іске қосу-реттеу жұмыстары жүргізіліп жатыр. ЖЭО-ға қосымша 120 тонна мазут жеткізілді, отынды жөнелту жалғасуда. Апатты жағдайды жою үшін «Қазмырыш» компаниясы ЖЭО-ға 20-дан аса қызметкер жіберіп, жөндеу-қалпына келтіру жұмыстарына қосымша жабдықтар берді», - деді облыс әкімі.

Сондай-ақ Өскеменнен «Востоквзрывпром» компаниясының 20 қызметкері, «Біріккен ЭнергоСервистік компаниясы» АҚ-ның 12 авариялық бригадасы көмекке келген.

«Риддер қаласының білім бөлімі басшысының міндетін атқарушы бұйрығымен 7-11 қараша аралығында оқушылар қашықтан оқиды. Осы уақытқа дейін қаланың мектепке дейінгі мекемелері жұмысын тоқтатады», - деді Даниал Ахметов.

Үкіметтің «Табиғи және техногендік сипаттағы төтенше жағдайлардың сыныптамасын белгілеу туралы» 2014 жылғы 2 шілдедегі №756 қаулысына сәйкес, бұл авариялық жағдай жергілікті ауқымдағы төтенше жағдай ретінде жіктеледі.

Жағдай ерекше бақылауда.

Риддерді жылумен жабдықтауды қалпына келтіру бойынша барлық қажетті шара қабылданып жатыр.