Бүгін Орталық коммуникациялар қызметінде «Жасыл даму» АҚ басқарма төрайымы Жанат Самат брифинг өткізіп, журналистердің бірқатар сұрағына жауап берді.

БАҚ өкілдері утилизация алымымен айналысатын «Жасыл даму» компаниясының Әлия Назарбаеваға қатысы бар-жоғы жайында сұрақ қойды.

«Жасыл даму» АҚ 100% Экология, геология және табиғи ресурстар министрлігіне бағынышты мемлекеттік компания. Компания ешкіммен үлестес емес. Ол тек мемлекетпен ғана байланысты, тек мемлекетке бағынатын компания, -  деді Жанат Самат.

Еске сала кетейік, қаңтар айында Үкімет қаулысымен өндірушілердің (импорттаушылардың) кеңейтілген міндеттемелері операторының (ӨКМ) функциялары «Жасыл Даму» акционерлік қоғамына берілді. Сонымен қатар, «ӨКМ Операторы» ЖШС-нің құқықтары тоқтатылған болатын.

23 ақпанда ҚР премьер-министрінің бірінші орынбасары Роман Скляр елімізде автомобильдерді кәдеге жарату үшін жаңа төлемақы мөлшерлемелерін жариялап, Қазақстанда утилизация алымы 50 пайызға төмендейтінін айтты.