Мемлекетке келтірілген 523 млрд залал өтеліп, заңсыз активтер қайтарылды
Оның ішінде шетелдік юрисдикциялардан 173 миллион АҚШ доллары өтелді
![](https://halyq-uni.kz/cache/imagine/1200/uploads/news/2022/09/20/63298fd27ea42419330025.jpg)
Экономикалық ресурстарды заңсыз шоғырландыруға қарсы іс-қимыл мәселелері жөніндегі ведомствоаралық комиссия жұмысының 3 айында жалпы 523 млрд-тан аса теңгеге мемлекетке келтірілген залал өтеліп, активтер қайтарылды. Бұл туралы комиссияның ресми өкілі Зейін Әліпбек хабарлады.
Қылмыстық істерді тергеп-тексеру аясында мемлекетке шамамен 518 миллиард теңге, оның ішінде шетелдік юрисдикциялардан 173 миллион АҚШ доллары өтелді. Прокурордың актілері бойынша мемлекет кірісіне 5 миллиардтан аса теңгеге 75 мың гектар жер қайтарылды. Сондай-ақ 600-ден аса теміржол және оларға қатысты жер учаскелері қайтарылды, – деп нақтылады Зейін Әліпбек.
Еске сала кетсек, комиссия мемлекет басшысы Қасым-Жомарт Тоқаевтың Жарлығымен құрылған болатын. Оны бас прокурор Берік Асылов басқарады.
Комиссияның құрамына құқық қорғау, орталық атқарушы органдар мен ведомстволардың бірінші басшылары кіреді.