Кәрім Мәсімов пен Асқар Маминді рейдерлік жасады деп айыптаған кәсіпкер Анатолий Балушкиннің мүлкі тәркіленеді. Бұл туралы экономикалық ресурстардың заңсыз шоғырлануымен күрес жөніндегі комиссияда айтылды деп хабарлады orda.kz.

«11 шілдеде Шығыс Қазақстан облысында Балушкинге (халықаралық іздеуде жүрген, «БИПЭК» компаниялар тобының акционері) қатысты іс бойынша 77 бірлік жылжымайтын мүлікті сотқа дейін тәркілеу туралы өтінішхат сотқа жолданды. Жылжымайтын мүлік (оның ішінде Рахманов қайнар бұлақтары, Нұртау және «Порт Фортуна») және мың жылжымалы мүлік», - деп атап өтті комиссия.

Бұдан бұрын Нұр-Сұлтанның мамандандырылған ауданаралық экономикалық соты Индустрия және инфрақұрылымдық даму министрлігінің «Азия Авто» көлік құрастыру компаниясына қарсы шағымы бойынша шешім шығарған еді. Сот «Азия Авто» компаниясын мемлекетке шамамен 174 миллиард теңгені қайтаруға міндеттеді.

Еске салсақ, «Азия Авто» АҚ директорлар кеңесінің бұрынғы төрағасы Анатолий Балушкиннің Қазақстан президенті Қасым-Жомарт Тоқаевтан ҰҚК-нің бұрынғы төрағасы Кәрім Мәсімовті, оның орынбасары Дәулет Ерғожин және бұрынғы премьер-министр Асқар Маминді жауапқа тартуды сұраған хаты жарияланған болатын.